本文重點
蜆壳電器（00081）出售控股權畀中國海外（00688）嘅交易似乎幾多波折，早前傳有另一中資機構想做程咬金，同中國海外爭過，最後中國海外都成功突圍，雖然佢已經成為最終同唯一買家，兼且同蜆壳嘅大股東傾好價錢，不過作為一家上市公司，唔係大股東話賣就可以賣，始終要睇吓小股東嘅意願。
主席胞弟唔贊成
今次喺中國海外出價嘅同時，就已經有「小」股東反對，呢位「小」股東係非一般小股東，而係蜆壳主席及董事總經理翁國基嘅胞弟翁國材，理論上係大股東嘅關連人士添，呢位集團非執行董事就講明話中國海外嘅出價太低，所以已向董事會表達佢嘅反對意見，並有意反對中國海外嘅收購。
根據蜆壳嘅公告，持有公司12.08%嘅翁媽媽表明支持收購建議，加埋擁有50.36%嘅翁國基，已有62.44%票數支持，不過翁國材都有8.33%，如果拉攏到其他股東，影響力絕對唔細。睇到呢度，太子不禁感慨近年嘅大家族點解有咁多分歧？