本文重點
中糧集團董事長寧高寧人如其名，非常愛寧靜，原來佢好鍾意朝早着對拖鞋落街買兩塊燒餅返屋企，整炒餅早餐畀囡囡食。不過，早輪內地有報道話佢快被停職學習，搞到滿城風雨，寧總要親身澄清，嗰份內地報章刊登道歉啟事，而寧總嘅平靜生活就被破壞咗。
想過低調生活
據講，件事發生後，寧總朝早落街買早餐都會見到啲記者等佢，佢唔想有人見到佢啱啱起身嘅樣。大家都知道寧總一向都執到自己整整齊齊先出街，有次去北京中糧總部辦公室搵佢，見佢書架後面有個大衣櫃，放晒唔同款嘅西裝褸，證明佢幾重視整齊。
寧總話自己其實好想過低調嘅生活，佢仲話家陣自己最享受嘅事係「今日無乜嘢做，可以睇吓書」咁話，近期佢就最鍾意睇柏揚嘅一系列歷史著作。