或者因為十月乃傳統股災月，加埋今年任總榮休，嚴重影響大孖沙十月前夕入市興趣，而且十多間公司排住隊招股，睇一個月拆息由0.1厘樓下升番唔少，全城抽新股熱，相信係市場成交萎縮、大市欲升乏力的元兇。

筆者唔主張抽新股，一來參考往績唔長，好難叫保守如筆者的投資者重錘出擊，假如買得些少，即使上市後節節做好，但對整個投資組合幫助又唔大。

抽新股散戶無着數

再者，聰明絕頂的包銷商，就市況釐定最進取價錢，即使短炒，水位往往有限。最重要係新股往往把散戶處於不利狀態，基金大戶在國際配售部分，操作上唔需要真金白銀攞出嚟，獲配多少一早有保薦安排，散戶相比下，要借孖展入飛成本加重，一掛牌互相踐踏，必然係唔使利息嘅大孖沙佔優，咁情況試問仲有乜好玩？不如响「現成」股票裏面搵搵落後對象更為上算。

永利（01128）招股，配售部分猶如畀面派對一樣，美資對沖基金Och-Ziff據聞入飛積極，全城名人富豪也幾乎個個有份。以為只對金融資產有興趣的大馬富商郭令燦，其掌舵的國浩（00053）也透過附屬公司認購5,000萬美元股份。

積極尋找投資機會

國浩資產豐厚無比，以昨日收市價76.75元計算，市值是253億元，而截至今年六月底止，國浩的資產淨值高達397億元，現價等於有36.3%折讓，而且當中唔少是高流動性的金融資產以及現金，兩者合計256億元，減去負債的57.4億，等於每股淨現金近40元。

金融海嘯時，全人類高唱現金就是王，但到現在看到環球股市同資產價格大幅飆升，投資市場開始要貨唔要錢。國浩積極尋找投資機會，像今次永利，以及月前在市場收集一間本地銀行股份，都顯出主理人積極為手上現金尋找回報的決心。

國浩控股公司大馬豐隆，向來都對金融資產情有獨鍾，十多年前透過國浩賣掉道亨，雖然坐享厚利，但卻選擇保留現金，正正是等待另一次低價入貨的機會，金融海嘯可能幫到一個大忙，即使金融資產與年初時比較，已經漲價不少，但對比○六年及○七年，還是處於較合理水平。

與其抽新股好似抽獎一樣望天打卦，不如以六五折嘅價錢買入國浩，史提芬相信更加有把握。