網上搜尋巨人Google以其Cloud Computing（雲計算）概念，殺入OS作業軟件業務，力挑微軟嘅一哥地位，但相信唔使幾耐，Google喺祖國市場將會遇到強大對手，事關馬雲嘅阿里巴巴集團同百度嘅李彥宏，早前已分別表明會喺雲端計算業務大展拳腳，李彥宏更明言百度遠景係要打造一個操作系統，與Google喺Chrome OS爭一日長短！
Cloud Computing構想係將互聯網與應用軟件全面結合，使電腦用戶以互聯網強大資源，代替以傳統軟件為本嘅個人電腦應用，Google目前嘅發展路向，就被公認為「雲計算」嘅最佳範例。
阿里集團早前成立「阿里雲」嘅新事業部門，表明要搶攻呢方面業務，大有要將阿里巴巴由電子商務及拍賣為主嘅業務，提升至網上工作必需品嘅層次！另外，百度嘅李彥宏亦大力提倡自己所力主嘅「框計算（BoxComputing）計劃」，誓要同Google嘅Cloud Computing概念分庭抗禮咁話！