本文重點
近排興起一陣退休風氣，繼柯大俠、李永鴻同埋李晉頤之後，太子收到風，銀行界又有人會退休，到底係邊個？就係中銀香港主管個人金融業務的總經理羅康平（Lawrence），好似話佢嘅退休大計年底生效，依家就放緊大假。不過，中銀香港仲未有正式公布。
Lawrence喺銀行界都係一個老前輩，未加入中銀香港之前，就喺滙豐工作超過廿年，在離開滙豐前主力做本地按揭生意，所以對香港嘅按揭市場相當熟識。
加入中銀僅三年
佢喺○六年加入中銀香港，距今只係三年幾，話咁快要退休，不禁令人有點唏噓，眼見近年有不少資深的賓架退下來，好似有轉型做礦業嘅柯大俠、李永鴻、李晉頤，再早啲就有陳棋昌、彭玉榮，實在是銀行界的損失，如果再加埋任總，真係愈諗愈失落。
至於Lawrence個位由誰人頂上，咪就係中銀信用卡副總經理梅月嫦，呢個月上旬已經生效。好多年前梅月嫦已經喺中銀信用卡做緊嘢，佢畀人嘅印象就係一個實幹型的職業女性，好做得，多年來默默耕耘，今日終於要離開中銀信用卡的崗位，再上一層樓，呢個亦係實至名歸嘅。