本文重點
前排內地出咗本書叫《朱鎔基答記者問》，等大家可以重溫朱總理頂呱呱嘅口才。同佢合作多年嘅前財長項懷誠，喺另一個訪問中透露咗朱鎔基當年為免財政崩潰，推行全國稅改嘅經過。
話說上世紀九十年代初，中央財政收入嚴重不足。喺九三年中，時任副總理嘅朱鎔基話，依家如果仲唔改革，捱唔到二○○○年，中央財政就會「冧檔」！
累朱鎔基瘦5磅
後來中央派咗13個部長去26個省市做調研，返中央後一人寫一條拎去國務院討論。當時主管經濟工作嘅朱鎔基笑言，13條唔吉利，要加幾條，後來就成為16條嘅「中央六號文件」嘞。
其實朱總當年都帶住官員親征，用兩個幾月走勻13個省，面對面同地方官算帳。項掌櫃幾乎跟足全程，唔係加班就係捱通頂，日日東奔西跑，對住地方官不時要忍氣吞聲，唔得就軟硬兼施。最後全部傾掂，朱總話自己足足瘦咗5磅。