太子尋日中午特登走咗去聽真明麗（01868）嘅中期業績，一心諗住拜會吓佢哋新上任嘅首席執行官曾金穗博士，殊不知轉頭竟然收到獨立財經評論員David Webb嘅驚人消息，話「曾博士」嘅博士學位好有問題，今回真係唔知攞景定贈興。
David Webb指「曾博士」所修畢嘅英國艾登威爾大學（Edenvale University）並非頒發學位嘅「認可機構」，因為喺英國政府所屬的商業部、創新與技能部門之下可頒發學位機構嘅列表之中，完全搵唔到呢間大學嘅名。
太子見咁大件事，梗係即刻想搵番個當事人或者真明麗主席澄清，可惜班高層於會議後已迅即返回內地，只係僅透過公關方面回應話，公司肯定曾博士通過有關程序及要求之下先取得博士學位，相信曾博士嘅能力、專業資格同對公司未來發展嘅貢獻。