港股勁升兩日後，好友略為放鬆，恒指回吐逾200點，成交額則減少至600幾億元。不過，外圍股市未見有太大的回吐壓力，相信在美期下周五結算前，都唔會有太大上落。雖然大市唔跌得，但近來志強手風真係唔多順，當炒股仔又無份，第一視頻（00082）日日升，志強膽小唔敢上車，至於所持國美（00493）唔上唔落，馬鋼（00323）又開倒車，惟有暫時按兵不動，免得做多錯多。
大市氣氛有改善，新股又再排隊上市，中冶金（01618）A股開始接受網上申請，國藥（01099）開始招股，相關上市股份料會發揮影子效應。中冶金雖然一半項目係地產，但另一半係有色金屬，今日志強吼住中國大冶有色（00661），博短期或炒有色金屬影子股。
中國大冶有色為天然礦產資源開發商，主要從事投資、開發及生產天然資源。集團今年四月正式獲國有特大型銅企湖北大冶有色金屬收購其控股股東49.89%，間接成為集團策略性股東，料有助大冶有色在探礦、採礦、選礦技術及管理經營等業務的發展。
另外，公司又跟新疆伊犁州合作，亦可為未來資源儲備提供保障。除上述兩項合作外，大冶有色早前亦與新疆有色簽訂合作協議，進行多樣化合作，包括由新疆有色提供礦產資源，大冶有色投入資金及技術合作勘探及開發，或雙方共同投入資金和技術，對新疆有色旗下礦產資源進行合作開發，前景可睇高一線。大冶有色短期具炒影子股條件，升破1.6元阻力，可望挑戰2元高位。