講到波頓，其投資理念其實係偏向價值投資一派，而佢嘅強項，是特殊事件投資（暫且將台灣譯本搬字過紙），即係搵一啲短期出現問題，不過極有機會翻生嘅公司進行投資，藉住市場短期對壞消息過激的反應，低買高賣。

不過作為一般散戶，要在市場上做到好似波頓一樣眾人皆醉我獨醒，真是談何容易。

遠嘅不提，曾被毒奶事件打擊的蒙牛乳業（02319），肯定係筆者過去一年最走漏眼的一隻翻身股，仲以為商譽遭三聚氰胺來個致命一擊，元氣定必大傷，但勢估唔到消費者同投資者一樣善忘，事件平息得快如閃電。

復原速度超預期

蒙牛剛曝光的中期業績，純利6.62億元人民幣，增長13.55%，銷售額只係比去年同期減少11.7%，可以看到其奶製品銷售，已回到毒奶事件前接近九成水平。大家也普遍忽視，經歷海嘯後內地原乳價格大幅回落，令蒙牛的採購成本大減，上半年毛利率26.7%，唔單止比去年同期的24.1%為高，更係○三年以來的最高紀錄，大大加快蒙牛業績的復原速度。

蒙牛股價今年內累積升1.1倍，目前市值361億港元，再看分析員預測數字，今年盈利估得最低係6.65億元，最高15.39億元，市盈率介乎20.6至47.8倍之間，基於上半年業績賺6.62億元，相信升至四十多倍的機會唔大，但回顧毒奶事件前，蒙牛市盈率介乎十五至六十七倍，即使目前估值唔算好平，但相信仍是大孖沙可以接受的價位，近兩日成交急升，睇嚟鞠躬認錯嘅投資者與基金經理唔少，以歷史平均市盈率三十倍計，相信中短線而言蒙牛仲未升完。