阿莊組合持有嘅蒙牛乳業（02319）及雨潤食品（01068）公布中期業績，蒙牛上半年純利增長約14%，配合未來與新大股東中糧集團資源整合所帶來的協同效益，阿莊有信心蒙牛股價可重返23至24元水平。

放大圖片	放大圖片	放大圖片

至於雨潤中期純利同比增長36.9%，喺期內出現豬流感，取得如此成績唔容易，以全年預測市盈率十三至十四倍計，現價估值具承接。

另外，下半年圍繞汽車股嘅投資焦點，將轉往商用車市場，可留意中國重汽（03808）。

銷售表現跑贏同業

重汽主要做卡車及發動機，上半年未能受惠乘用車消費熱潮，反受工程用車需求下降影響，幸好中央推動各項大型基建啟動，否則情況更壞。

今年上半年，全行業共銷售重型卡車（14噸以上）27.4萬輛，同比下降28%，同期重汽重型卡車銷量同比下降21.4%，若計及母公司銷售，二者期內銷售僅跌2.3%，優於行業平均水平，市佔率同比提高6.5%，繼續穩坐一哥地位。

未來，重汽一項重要工作，係做好與德國MAN公司嘅合資項目，以加快推動本身嘅重卡設計及生產製造工藝國際化。要知道，目前中國商用車產品售價只係國際同類產品嘅兩至三成，只要能夠解決環保及燃油效率嘅問題，海外市場大有可為。重汽這個中外合資項目，可謂走對了方向。

七月中旬以來，重汽股價一直喺8.5至9.5元水平上落，昨日股價逆市上升3.3%，收報9.58元，睇勢短期有力上試10至11元水平，回吐宜守8.4元。