本文重點
港交所（00388）行政總裁周文耀明年一月榮休，依家各方人士已經密鑼緊鼓，諗緊點同佢搞歡送。五大證券經紀組織，包括證券商協會、證券學會、證券及期貨業職工會、網上經紀協會、專業財經分析及評論家協會，已經諗住聯合一起賀周文耀榮休。
五經紀組織一齊搞
證券商協會嘅蔡陳葆心預計，嗰場聚會起碼有逾一千人參加。吓，咪變咗千人宴？
蔡太話，依家距離明年一月仲有時間，但初步計劃，五個經紀團體會一起搞歡送。太子就諗，如果屆時有成千人參加，以每圍十二人計，都要八十幾圍，都算大陣仗，又唔知會喺邊度搞呢？相信屆時都算係近年最熱鬧嘅告別宴之一。
唔講咁遠住，蔡太話，今晚證券商協會已經邀請咗周文耀飯局，慶祝佢早前攞咗科技大學榮譽院士。佢話原來諗住今次飯局只係兩、三圍，點知個飯局電郵一出，報名人數如雪片般飛來，最後個飯局有成百人參加，有十圍咁多。蔡太仲笑話，如果多啲人知道今次飯局，起碼有三百人參加。由此反映出周文耀喺經紀圈中嘅江湖地位。