身為搞手嘅富昌證券總經理兼「狂牛隊」隊長藺常念話，今年有滙豐銀行同創興銀行（01111）兩支勁旅加入，相信之後嘅賽事一定非常激烈。藺Sir回想第一屆只得兩隊人參加比賽，今年第四屆就增加至八隊人，佢話真係愈諗愈開心。

雖然首輪單循環賽唔會淘汰隊伍，不過比賽當日，上屆冠軍恒生銀行（00011）對戰新加入嘅創興隊，恒生隊以54比26大熱勝出。

藺Sir領軍 狂牛大勝

藺Sir帶領嘅「狂牛隊」面對中信嘉華銀行嘅猛攻，最後亦以39比23分順利獲勝。而當日無落場跑番兩轉嘅藺Sir笑言：「橫掂都贏咁多，唔使我親自落場都得啦。」藺Sir同太子大爆料，話今個周六會有兩支勢均力敵嘅隊伍對賽，就係滙豐對港交所（00388）。