正所謂「有人辭官歸故里，有人漏夜趕科場」，金融界都係咁。已經好耐冇擔任過上市公司職務嘅溫文儀以五十八歲之齡，再次步入職場，入主香港建設（00190）做執董兼董事總經理；反而五十二歲嘅富邦董事總經理兼行政總裁李晉頤就宣布提前退休。
溫文儀坐鎮香港建設
溫生以前打過恒基地產嘅工，近年就低調好多，大部分時間打理佢自己間測量師行，又做吓同地產有關嘅公職。佢尋日開始返香港建設做執董同埋MD。其實佢之前都有做過香港建設旗下附屬公司嘅董事，今次嘅安排，睇落好順理成章。
佢旗下嘅溫文儀測量師行早在今年三月，已經同香港建設簽訂顧問服務協議，每年收取720萬元顧問費。至於今次佢做執董，酬金每年10萬元，做MD年薪幾多就未公布。於香港建設嘅執董陳國芳因為周圍飛冇時間兼顧而辭任執董，不過，佢就會留任首席財務官，幫公司睇住盤數。
富邦李晉頤提早退休
資深銀行家李晉頤提早退休嘅決定，令太子有點驚訝。富邦話董事會經已搵到合適人選接替李生，依家仲有待監管機構批准。而李生仲會做資深顧問直至十二月底為止，以便順利過渡。