筆者認識的基金經理老友，唔少都話錯過早前升浪，手上有的是現金，都想等大市回到萬八點樓下入貨，但經驗告訴我哋，當愈多人預期調整出現，個市愈難回頭，與其守株待兔，倒不如奉行買股唔買市，選定對象趁市況靜靜地儲番啲倉底。

中期業績期出得七七八八，業績需要相當強勁，才支持到過去半年大幅回升的股價，再向高位推進，恒安（01044）與思捷（00330）可算是最佳的正反面教材。

定單回升尚需時間

比較意外嘅，可能係集裝箱生產商勝獅貨櫃（00716），截至六月底止的半年勁蝕2,736.5萬美元（下同），雖然七月早就發過盈警，但營業額大跌82%，意味着在金融海嘯影響航運業下，新集裝箱需求大減，勝獅五分之四生產活動停頓，都咪話唔得人驚，偏偏股民好少理，當壞消息出盡嚟炒，股價倒升0.04元，報1.45元。

去年，筆者嘗試以最壞條件，評估唔少目標股份，可唔可以抵禦金融海嘯而生存下來，最基本條件係假設半年甚至一年，公司接單或者生意大跌七至八成，股東資本可唔可以應付最基本的固定開支，例如租賃及薪酬等。

勝獅生產集裝箱，賺微薄的加工費，屬於資本密集生意，成本主要係鋼材、財務利息及薪酬，上半年生意大減，材料及買料成本同步下降，人手調配變得關鍵，管理層表示已縮減到一班生產，出來效果唔錯。上半年僱員薪資由4,160萬大減六成六，去到1,390萬，大約等於虧損額一半，再睇持有8,300萬現金（上半年透過供股，負債亦大減四成三）。

在財政上，勝獅捱過寒冬唔難，第三季航運業開始見相當微弱的復甦，鋼鐵價格也由高位回落，有助改善毛利，問題反而係定單幾時先至大幅回升。事實上，在不明朗的景氣下，唔少船商都會先用住舊箱，睇清楚情況，形成新箱定單出現滯後。

勝獅現時市值30.6億港元，即是3.42億美元（26.5億港元）資產淨值的1.15倍，回顧過去十五年，勝獅市帳率介乎0.11至3.7倍（平均值大約1.6倍），目前估值有點尷尬，由分析員估計盈利復甦進度來看，筆者覺得接近1.5元有點貴，在1.2元水平附近，才有較大跟進價值。