內地工信部表示，3G牌照4,500億元人民幣直接投入，將可創造上萬億元人民幣嘅經濟總量，對於應對當前金融危機，起着重要嘅作用。

事實上，3G產業投資涉及嘅範疇廣泛，除咗初期嘅大型電訊網絡及設備投入之外，繼後相關嘅配套，包括機件及內容供應，確實可以衍生出可觀嘅新市場，特別係3G標榜提升多媒體內容等新功能、移動電訊內容多元化及普及化，將為行業帶來可觀嘅發展潛力。

A8電媒（00800）亦係3G產業興起嘅受益企業，最近公司宣布中期業績，收入同比下跌11.8%至2.9億元人民幣，雖然純利同比增長21%至4,489萬元人民幣，但與去年下半年比較，則平平無奇，表現有點令人失望。

A8電媒累升已多

雖然A8電媒已建立原創音樂平台，但老實講，呢瓣業務潛力大，競爭亦大。今年來，股價更由低位回升，累計升幅超過五倍，反映所處行業進入高增長期，除非盈利表現有較大突破，或進行購併，否則現價值博率不見吸引。

講開業績股，阜豐集團（00546）去年度業績大躍進，純利按年增長5.5倍，可謂金融海嘯之下嘅奇葩。公司最近發出盈喜，換言之，今年以來盈利繼續保持快速增長。

以現價計，○九年度預測市盈率將降至低單位數字，派息亦有望增加。若然最終業績真係咁好，股價應可向上突破近月嘅橫行區。

另外，上海實業（00363）再落實注資計劃，今次係向母公司收購兩幅上海青浦住宅用地。其實，阿莊亦唔只一次講過，上實決心重整業務，去蕪存菁，專注搞內地房產及公路基建，值得予以另眼相看。

繼公布出售中芯（00981）及所持光明乳業權益，出售非核心資產基本上已完成，未來重點工作將落在購併活動，以加快核心業務發展，預期年底前尚會有收購行動。

落實注資去蕪存菁

作為一家老牌紅籌，其實上實依家做緊嘅舉動，早應該要做，但遲做好過唔做，畢竟公司係上海市政府窗口企業，上海市正密鑼緊鼓搞好國際金融及航運發展，旗下上實無道理繼續再做「龜仙人」，靠食老本過活。市場對其重組方向反應正面，今年以來嘅進度亦令人滿意，相信股價高處未算高，40元樓下應該睇位買而唔係沽。