佢話人與人之間嘅了解和溝通好緊要，做調解員就係為咗做好呢樣嘢。佢嘅心得係最緊要中立，不可偏袒一方，不可隨便發表意見，即係話要客觀地點出雙方嘅實際情況，了解各自嘅立場同問題，然後幫助當事人進行和解。

佢話調解員同法官唔同，唔係去判斷邊個啱，邊個錯，而係要扮演溝通嘅橋樑，喺和諧冷靜嘅氣氛下，達致和解。佢仲話，只要肯了解，願意溝通，人與人之間嘅紛爭自然會少一點，每個人在生活中，都可以成為調解員。

做善事人人有責

鄭家成早前親自出馬，支持「光彩明天行動」兼慷慨捐助廣東懷集縣嘅孤兒之後，佢喺集團嘅刊物《新語》中接受專訪時，都語重心長咁提點大家做善事，唔好只係為咗表達自己，而應該要當作係幫助無助者嘅責任。