薛太「多粒花」做非執董

尋日恒生又宣布董事會成員有變更，常務董事兼副行政總裁潘仲賢辭職；而由滙豐空降恒生、即將出任恒生中國副董事長兼行長嘅薛關燕萍則出任非執董；總經理梁永祥就獲委任為執行董事兼個人銀行業務主管。

薛太同梁高美懿都係滙豐出身，聽講兩位都幾Friend，今次對薛太委以重任，拍住上。至於都係出身於滙豐嘅潘仲賢，恒生話佢要尋求個人發展而辭任，九月底生效。

另外，恒生非執董兼滙豐銀行財務主管魏國麟喺下月開始，出任滙豐北美業務財務總監，所以九月起亦會辭任恒生董事職務。至於將接替魏國麟香港職務嘅，就係現任滙豐北美業務高級執行副總裁兼財務總監麥榮恩。