前日推介嘅中國燃氣（00384）終於起動，昨日高見2.29元，收報2.27元，升9.6%。此外，前日阿莊沽出嘅通達集團（00698），股價幾近打回原形，收報0.23元，都係升得太急之過。阿莊承認，呢隻股仔出咗名難炒，但以基本因素和估值論，股價回落到0.2元樓下，真係唔怕買，特別係本月中旬，若同樣從事電子消費品外殼產品嘅巨騰（03336）中期業績明顯優於預期，對通達嘅外殼業務前景亦有一定嘅啟示作用。
滬綜指繼續喺3,400點水平上落，無可否認，隨着A股順利重啟IPO，A股市場嘅融資功能經已恢復，上市公司增發個案增加，這對於支持企業加速發展，確保經濟持續增長，有着積極意義。
每年踏入第三季度，都係內地乳製品消費嘅高峰期，相信今年亦不例外。據內地傳媒報道，內地各大乳品企業已逐步走出「毒奶」事件嘅陰影，產銷均已重納正軌，其中蒙牛乳業（02319）銷售已回復至「毒奶」事件前嘅90%水平，預期到了年底，行業將完全恢復過來。
眾所周知，「毒奶」事件嘅導因，乃喺內地乳業產業鏈發展中，奶源這一個環節十分薄弱，造成先天性問題。要知道，全國液體奶產量由二○○○年僅130萬噸，增至二○○八年逾1,500萬噸，下游需求龐大，但偏偏上游養殖業分散，奶源出事係遲早嘅問題。故自「毒奶」事件後，內地已加強乳業生產管理，並要求在二○一一年十月底前，所有乳製品生產企業自產鮮乳與加工能力比例要達到七成以上。
上游業務有待拓展
目前，蒙牛嘅自建奶源比重估計喺兩成以上，明顯與七成以上嘅目標有一段距離，故可以預見，未來蒙牛必須投入更多資源拓展上游業務。上月初，公司宣布引入中糧集團及厚樸基金為主要股東，正好有助解決資金嘅問題，亦解除被惡意收購嘅風險，一石二鳥，未來可專心一意搞好核心業務。
環顧整個行業，未來競爭有增無減，蒙牛泊得大碼頭，總算稍為安心。再看其股價，已回復至「毒奶事件」出現前約八成嘅水平，頗大程度反映產銷回復正常，以及原奶成本下降等因素。如無意外，下月公布嘅中期業績，可確認公司業務走進復甦之路，但往後股價上升動力，還要視乎產銷增長速度，以及推進牧場規模化進展。
其實更貼切啲講，蒙牛已由一家民企，轉變成大型國企—中糧集團旗下一個業務分支，日後雙方勢必展開業務合作，這有助蒙牛拋離其他競爭對手，股價亦自必可重展魅力。