本文重點
國資委主任李榮融出席公開場合一般都係講政策，畀人嚴肅嘅感覺，原來佢其實都幾風趣。好似佢喺廣州召開嘅《遵循企業發展規律，推動國有企業科學發展》專題報告會上，就自認係「好老闆」，因為佢唔會搵老實人笨喎。
李榮融話，由○二至○七年間佢平均每年為央企1,556位副總以上嘅領導加咗4,600蚊人工，仲話攞高薪要靠本事，但出糧畀員工都要講良心。佢又大爆之前有間大型國企老總年薪得6萬幾蚊，老總可以出少啲糧，但「下面的人早跑光了」。所以李榮融話佢做官嘅宗旨，就係唔欺負老實人。
冀央企如米高佐敦
除咗話自己係一個好老闆，李榮融仲喺會上妙喻央企為「共和國長子」，又以美國職業籃球聯賽NBA做譬喻，話NBA成功之處在於有劇情，而製造劇情嘅正正就係場上嘅球星。不過，球星都分明星同巨星兩種，明星雖然不停閃爍，但真正能夠承擔責任，從來唔會令教練、隊友失望嘅先係巨星。李榮融話要培養央企好似「籃球之神」米高佐敦一樣嘅巨星，喺重要關頭「一定能扛起來」，承擔巨大責任。