本文重點
好多上市公司通常透過授出購股權獎勵對公司有貢獻嘅員工，又或者向公司高級管理層發出授股權以留住人才。盈進（01386）尋日出咗個通告，特別之處在於大股東Smart Presto向公司兩位執行董事喬維明及朱賢文分別授出600萬及400萬股盈進購股權，藉此留住兩位人才。
由大股東授出
今次由大股東向兩位執董授出購股權，並非從公司授出購股權，做法同其他公司唔同，受讓人之一嘅朱賢文解釋話，主要係大股東已持有公司72.28%嘅股份，若公司授出購股權，可能會觸及公眾人士持有不少於25%股權條例。
而盈進同時宣布，涉及2,490萬股股份授予主席陳美雙及29名員工，每股行使價為0.6元，同上述兩名執董相同。
盈進前主席洪文藝喺舊年二月突然去世，由太太陳美雙承繼遺產，代夫擔任上市公司主席，剛巧碰上經濟衰退，影響零售市道，加上成本高企，公司業績不及以往，相信公司今次係為咗穩定軍心，留住人才，故授出購股權。