睇宏觀環境，港元跟住美元匯價齊齊喺三月份見頂，兌各主要貨幣不斷貶值，美國經濟實在太差，存款零息期可能比預期來得更長，基本條件有利資產格價及股市發展，再加埋近日數據支持下，愈來愈多基金經理轉軚，相信中國的洪水式貸款政策收效，保八在望。

滙控料可追落後

最多人會問仲應唔應該入市。史提芬答案係肯定的，尤其中線睇，○八年第四季大部分上市公司業績經歷黑暗期，基數甚低之下，今年應可輕鬆地大反彈。常言道好消息出貨，依家股市只係開始押注海嘯後經濟見底，仲未開始對第四季業績有太大憧憬，如果無估計錯誤，股市瘋狂升勢隨時可能延續到今年底至明年初，只要能夠承受一成至一成五股市波動（當然不計炒到離譜的垃圾股），現在才入市應該為時未晚。

尋日滙控（00005）、恒生（00011）公布業績，滙控成績表稍勝預期，恒生賺64.5億元同市場預測中位數數66.5億元差無幾，兩母子派息維持首季水平，分別係8美仙及1.1港元。近期歐美金融股成為火車頭，相對而言，滙控升勢未算過分，業績後應可增速追補落後。

股市雞犬皆升，工業股可能是少數未發力的股份，被定性為紡織股與零售股的德永佳（00321），過去三個月，股價大部分時間在5.5至6.5元之間浮沉，論估值及復甦概念都頗值得留意。德永佳截至今年三月底止業績，純利跌7.1%得8.6億元，以下半年內地紡織業出口情況，此成績已算有交代，主要係內地零售分銷生意，抵銷了海嘯下倒退的紡織生意。

內地消費市道唔使點擔心，反而紡織布生意，會係德永佳能否被市場重估的重點，但由內地棉價及煤價回落，對今年毛利應有幫助。

雖美國銷售比重高，但中國紡織布內需不斷增加，○九年或最遲一○年可望超越美國成為單一最大市場，德永佳業績大反彈是可以期待的，預期市盈率唔使九倍，息率亦唔錯，料有7厘以上，唔想追焦點股驚接火棒，德永佳諗得過。