尋日恒指再創新高，市場資金仍然輪流炒作不同板塊，好似尋日就有消息指，內地商務部現階段正加緊研究新能源汽車優惠政策，所以一眾汽車股亦見再受追捧；至於一直落後大市的航運股，在市場憧憬經濟復甦底下，尋日表現亦都大幅做好。所以話，尋日個市，幾乎各類型股份都「無一幸免」咁升，不過，若硬要數走勢較為輸蝕的，就可數到醫藥股。
滙控（00005）份成績表總算不過不失，畀到股東一個交代，因此尋日討論區上，就有不少網友將一致看好滙控今日的表現。翻查一下，知道原來尋日滙控的牛證，又真係錄得1,159萬元淨流入，看好之人真係大有人在。
其實自今年三月至今，中港兩地股市的確上升了不少，故早前已多番提到，內地證券股應可以受惠。尋日內地就有報道指，於過去七個月，當地券商行經紀業務合計入帳佣金為787.28億元，經已超過去年全年的佣金收入。可想而知，今年中港兩地券商股，應該食唔少肥雞髀啦。