本文重點
港股上周成功考驗2萬點關承接，上周五恒指收報20,573點，一周升幅2.9%，平均每日成交額846億元。市場資金維持充裕，雖然見到高位有唔少獲利沽盤，但買盤亦相當積極，好淡爭持。若外圍市況配合，本周恒指有勢上試21,000點關。
保險資金蓄勢待發
中國保監會公布，截至六月底，保險資金運用餘額3.37萬億元（人民幣．下同），其中銀行存款佔31%；債券佔50%；證券投資基金佔6.8%，股票含股權佔9.8%。可見，保險資金投資股市嘅比例仍留有餘地，若未來保險公司增加股票投資，有了這類長錢捧場，A股擴容應無礙升市，而香港嘅中資股將繼續成為資金追捧嘅對象。
阿莊持有嘅中保（00966）成本價只係14.9元，上周五高位曾見23.55元，收報23.4元，升9.8%，帳面回報率已逾五成，繼續由它放紙鳶。
針對紅籌股，睇好下半年內地消費市道，華潤創業（00291）具值博率。過去幾年，華創悉心打造零售及消費業務王國，目前核心業務包括超級市場及物流、服裝品牌經銷、零售業務、飲品、食品加工及經銷等等，正好食正內需熱潮。今年上半年，佔公司經營溢利近半嘅啤酒業務，銷售達雙位數字增長，喺原材料成本下降之下，毛利看漲，業績表現有保證。
展望下半年，中央政府明言要再力谷消費，華創勢成政策受益者，年底前亦不排除會再獲母公司注入零售業務，可以視為內地消費股股膽。