上星期，中港兩地股市一度出現深度調整，令人擔心是次升浪是否經已正式結束，但及後人行宣布寬鬆政策不變，中港兩地股市再度發力向上。上周五上證指數重上3,400點樓上，恒指亦收復20,500點水平。股份方面，由於市場再度大炒回歸A股概念，因此上周五一眾落後紅籌都見炒上，愈落後升勢就愈急，好似粵海制革（01058）全日升逾14%，成為紅籌升幅之冠。由於現時市場正瀰漫着一股紅籌熱，大家不妨從中加以尋覓一下。
上周五，電力板塊升勢亦見強勁，當中以中國電力（02380）升幅最大，全日升逾10%，收報2.78元。有人話，電力股做好，係因為電力需求於七月份仍繼續回升。其實計我話，咁就要多得家電下鄉的政策，令到開冷氣、開風扇的人多咗，電器用多咗，電力需求就自然有所上升啦。
此外，近排成日聽到有股友講，內地股市氣氛暢旺，樓市方面亦唔輸蝕。之不過，根據深圳國土房產局的數據顯示，其實深圳新房成交量經已連續三個星期下降，並且出現加速下滑趨勢。上周深圳新房成交量就暴跌四成。雖然中央表面上無打算壓抑股市，之但係唔知大家記唔記得，近日有中房協官員就直言話要阻止房價漲勢蔓延，故不排除及後真的會有抑制房價政策出台，要留意內房股走勢啊。