組合方面，阿莊昨日悉售光控（00165）4萬股，平均價24.9元，獲利約29萬元。同時阿莊入場買咗10萬股中國南車（01766），平均價4.8元。

大市整固，游資炒股不炒市，唔少二、三線股都相繼起動，就如昨日大市一度跌穿兩萬點，股仔照炒可也，午後升勢更急，就如濱海投資（08035）、榮暉（00990）、裕田（00313）、大昌微線（00567）均名列二十大升幅榜之列。

事實上，唔少廠商捱過上半年嘅艱難歲月，下半年雖未知出口市場復甦進度，但至少情況穩定下來，業務有了改善的基礎，工業股確實有其留意價值。

食住呢條水，今日就講講隻通達集團（00698）。此股主要製造及銷售電器配件及通訊設備等產品，去年收入增長22%至13.93億元，但純利急跌62%至6,530萬元，主要係去年原材料成本上升，令銷售成本急增，毛利受壓，加上行政開支增加所致。不過，呢個係通行面對嘅問題，更何況通達尚在培育新業務，業績算係有交代。

家電業務勝在穩健

去年，公司策略性地增持造手機外殼、手提電腦外殼及其他電器外殼等產品嘅通達（廈門）科技權益至75%。目前，聯想、華碩、諾基亞、索尼愛立信、華為、中興，均為其手提電腦或手機外殼產品客戶。受惠內地電子消費產品銷售理想，相信今年業績會見到增持行動所帶來嘅效益。

此外，公司嘅家電業務亦十分穩健，已跟海爾、美的、飛利浦、三星等建立長期合作關係。今年家電下鄉及以舊換新措施，大大刺激家電消費，相信通達亦可受惠。

查實，通達拓展包括手機及手提電腦外殼等模內鑲件注塑（IML）產品，亦只係近幾年嘅事，證明公司管理層有遠見，成功建立新嘅業務增長點。阿莊估計，今年通達嘅營業額可突破18億元，而原材料價格下降，以及產銷規模效益，將有助提振毛利表現，現價預測市盈率僅單位數字，往績市帳率0.6倍，論估值確實有其吸引力。

有時買股仔最重要唔係平唔平，而係有冇人氣。睇通達近月成交明顯增加，昨日股價創五十二周新高，走勢對辦。早兩個月，大股東王氏家族入場增持，亦係一個正面訊息。照計0.2元樓下可以睇位跟進，一半要嚟炒，一半放入倉底。參考此股自二○○○年掛牌以來，每三年炒一轉嘅作風（之前係二○○三及二○○六年），若博中今年再現大升浪，升幅可以倍計。