本文重點
金融海嘯暴露金融界貪婪嘅面目，搞到以前萬人膜拜嘅Banker（銀行家），依家經常畀人話厚顏無恥，滙控（00005）主席葛霖似乎想搞番好個形象，佢尋日就話銀行家搵錢雖然多啲，但同普通人一樣取諸社會，用諸社會，應該需要負起更多社會責任咁喎。
倡撤巨額花紅制
原來唔計各項花紅，葛霖上年已經搵成125萬美金（約975萬港元）底薪一年，近排銀行家可謂人人喊打，加上滙控之前份業績唔多掂，自然好易成為攻擊目標，佢尋日就義正辭嚴咁呼籲業界取消巨額花紅制度，仲猛插一啲投行經常將盈利預先派晒畀啲賓架嘅做法係唔啱喎。
葛霖話，銀行家喺社會度搵咁多錢，自不然需要回饋社會，仲話真正嘅快樂係來自對社會嘅責任感喎。太子覺得葛霖講嘅嘢都幾啱，不過滙控早排公布上年業績，就畀輿論猛插佢哋唔發盈警，又唔知算唔算有責任感呢？仲有，葛霖咁講係咪即係今年唔出花紅先？