近日地產股現獲利回吐，而中移（00941）更喺大行唱淡之下，一度回落至80元，收報82.25元。依阿莊所見，中移現價仍較五十二周高位有近三成距離，表現落後，已反映了同業競爭激烈嘅因素，短線股價波動，主要係大戶借佢嚟舞高弄低指數震倉之故，若非有重大不利消息出現，毋須過於悲觀。

滬市新股中國建築（601668）昨日首天掛牌，開市見6.7元（人民幣．下同），一度搶高至7.96元，收市報6.53元，較招股價升56%。市場惟恐其成為中石油A股翻版，股價一步到位，滬、深二市同跌逾5%，乃近期少見嘅跌市。

香港方面，新股金隅（02009）表現唔錯，高位曾見10.5元，收報9.97元，較招股價高出56%，全日成交76億元，中獎者自然笑逐顏開。經驗告訴筆者，呢隻新股大戶中籤率低，唔少大孖沙都要等待股份掛牌後先至喺市場入貨，故若然隻股真係未到價，掛牌後三、五個交易日可見真章，故開市高追者暫未言敗！

查實有番咁上下炒股經驗嘅投資者，應該好明白，無論港股抑或A股，累計升幅甚巨，高位難免風高浪急。昨見金管局再向市場注資，銀行體系結餘預測增至接近2,200億元，顯示資金仍然不斷流入香港市場。今次大升市既以資金主導，資金流入趨勢未改，後市料可保持大漲小回局面。

業績倒退應屬短暫

受到鐵路貨車需求下降嘅影響，中國南車（01766）今年上半年業績幾可肯定會有所倒退，故見股價表現跑輸整體中資股。不過，搞鐵路基建，乃未來數年中國刺激經濟政策嘅核心部分，故見投行對於南車未來數年嘅盈利前景展望並不悲觀。阿莊深信，中國南車係一隻高增長股，今年上半年業績倒退只係短暫現象，而大戶則睇準呢個機會，以此作為壓低股價收貨嘅藉口。

展望下半年，隨着內地經濟逐步回暖，貨車及機車需求可重現上升動力。此外，今年初鐵道部規劃要動工嘅十八個重點項目，涉及逾1萬億元人民幣，分三至四年完成，據講該批項目中，至今僅得三至四個獲批立項，預計其餘將於今年下半年陸續獲批立項。以中國南車嘅市佔率，幾可肯定能分一杯羹，點睇股價都唔應該咁落後，喺5元樓下，不妨逢低收集。