何解經濟唔好，但股市照升？也許閣下可從股神巴菲特的話中找到答案。

佢老人家話，即使美股已重上9,000點，也不願沽貨，事關深信長遠計美股表現仍可跑贏其他定息投資。而雖然呢一刻經濟復甦步伐仍然緩慢，但不代表目前唔應該揸股票，相反，股市通常會預先反映經濟表現，若然要等到有實際數據支持才入市，好可能已錯失入市的好時機。

港股方面，唔經唔覺已升至2萬點邊。政府數據顯示，目前一手私人住宅施工量及待動工單位都創出近年新低，相信是近年發展商透過勾地增加土地儲備的個案大減，加上近年政府回應市場減建屏風樓要求，亦一定程度影響了住宅供應。

買地產股有心唔怕遲

樓市新貨供應少，自然有利穩定樓價。即使未來一、兩年，政府多放靚地入勾地表，若成交價理想，到時大家睇見「麵粉」賣緊咩價錢，「麵包」售價就更加跌唔落。所以筆者相信，要買地產股，有心唔怕遲！

內地股市升完可以再升，A股重啟IPO，進度比預期理想。中央政府近期多次重申，下半年首要工作是搞好經濟，短期沒有收緊貨幣政策的意圖，大家可以繼續放心入市。

國家電網統計顯示，上月發電量同比增長3.6%，乃自去年十月以來首次錄得正增長，而七月上旬日均發電量同比上升3%，顯然正增長勢頭得以延續。要知道，究竟經濟有沒有復甦，從電力需求數據便有分曉。電力需求增長持續「轉正」，顯示電力業已走出低谷，加上煤價趨穩，下半年電力股應可發力收復失地。

在眾多電力股之中，華潤電力（00836）是基金愛股，皆因近幾年往績紀錄最好，○七年高峰全年純利達32億元。即使去年唔少電力股業績見紅，但潤電仍錄得純利17億元，全靠管理層經營得法，而新收購的電廠亦提供不俗的回報。

去年煤價狂升的負面因素，今年不復再，加上電力需求復甦動力正在加強，今年年中潤電又已進行了供股，充實資本狀況，為應付下一個上升周期作好準備。橫睇豎睇，此股大有條件在電力股復甦升浪中跑出，會繼續視為首選對象。