美國幾間大企業，好似微軟、亞馬遜以及美國運通，上個禮拜公布業績都差過預期，但消息並冇拖累整體美市氣氛，道指上周五仍然上升23點，收報9,093點。再睇港股，雖然上周五恒指於20,000點樓上只係停留咗短短兩分鐘時間就跌番落嚟，但勢頭依然強勁，全日再有36隻熊證被收回，所以計我話，現階段真係不宜輕易做淡。
至於內地股市方面，由於熱錢仍然充斥，因此A股亦有「跌唔落」嘅感覺。有消息就指，基金對上證指數的首步目標為3,800點，難免為股友們帶來憧憬。
本港新股熱潮仍然熾熱，內地亦都唔弱，繼中國建築呢隻「大龍躉」之後，光大證券亦都獲得中證監批准發行A股，成為六年以來內地首間證券商獲批上市。難怪早前內地證券股已偷步先行，料及後仍會續有炒作，值得留意。