02/07/2009

播放本新聞相關短片
 
股價號碼: 

股海實戰:中國水務區間炒作

港股半年結,恒指上半年升約28%,而國企指數則升約39%,究竟升幅係咪已經預先透支對經濟復甦嘅預期,下半年股海何去何從,乃投資者關心嘅問題。不過,資金市向來都難以捉摸,與其花心神估指數高低,倒不如花精力發掘值博個股。

本周二掛牌嘅361度(01361)全日高位見4.28元,驗證阿莊所言,認購「中獎」者可穩賺一成利潤,惟當日尾市恒指轉升為跌,該股亦現獲利回吐,收市報3.9元,但仍較招股價高出8%。本周五霸王(01338)及秦發(00866)掛牌,因認購新股而遭凍結嘅資金將陸續鬆綁,究竟呢批資金動向如何,足以左右短期大市走向。

內地A股恢復IPO以來,首隻新股桂林三金藥業已確定新股發行價為19.8元人民幣,詢價超額認購165倍,定價相對於初步詢價嘅最高報價25元人民幣,明顯留有餘地,加上集資規模並不大,相信可以開個「好頭」,為嚟緊更多A股IPO活動造勢。

講開A股,唔經唔覺,滬綜指已升近3,000點心理關口。不過,七月將會係今年大小非解禁嘅首個高峰期,初步估計解禁股份市值近1萬億元人民幣,其中大部分來自中國銀行(601988)。

近日內銀股走勢偏強,跟大小非解禁前嘅資金部署有否關連,倒值得關注。

周一阿莊已表明,考慮沽出中國忠旺(01333)獲利,周二遂以平均價每股11.2元沽出10萬股,獲利約42.3萬元,都幾和味!至於周一買入嘅雨潤食品(01068),冷不妨翌日遭一名機構投資者減持,每股作價11.75元,涉及逾7,000萬股股份,涉資約8.3億元,故見股價明顯受壓,收報11.7元,跌6.4%。正所謂「有人辭官歸故里,有人漏夜趕科場」,短線喺11元或樓下,阿莊會睇位加注。

中國水務(00855)周二復牌,並宣布按每股1.9元配售最多1.2億股,集資2.28億元,作為一般營運資金。目前,中國水務業務覆蓋內地二十多個縣市,前年底公司入股水利部屬下中國水務投資公司,奠定與中國水利部嘅合作基礎。近年公司致力於構建包括水資源開發、供水系統、污水處理及水利工程建設在內嘅全面產業鏈,並積極研究投資水力發電項目。

全年業績料續虧損

如今圍繞內地水資源嘅投資概念尚在起步階段,若然中國水務認真培育本業,照計應該可以有一番作為。只是公司截至去年三月底止年度賺4億多元,但沒有派息;而截至去年九月底止中期毛利雖然大致偏穩,卻因投資物業估值虧損、財務資產及衍生工具公平值虧損,而錄得淨虧損1.85億元,估計全年度業績仍然未能轉盈。

若稍後年度業績出爐,宜留意撇除特殊項目後之核心業務營運表現,以及往後管理層如何善用公司手頭上逾7億元的現金(已計及今次配股集資所得)。

短期集團股價料在1.7至2.3元水平上落,可於此區間採取高沽低揸策略,小注怡情。

投資要精明 助你成為投資達人
詳情瀏覽on.cc《精明理財》

阿莊