本文重點
內地正式推出3G服務後，今年來一眾電訊設備股嘅表現都唔錯，京信通信（02342）算係其中一家，公司嘅股價由舊年嘅幾毫子，一直升到最近期嘅4.16元高位。有見公司股價表現愈來愈好，尋日公司發出一項公布，話主席霍東齡用收市價以場外轉讓方式，向多名董事及高管轉讓咗3,000萬股京信股份。
交易完成後，霍主席持有嘅Prime Choice喺京信嘅持股量，就由43%降至39.8%，以尋日京信收市價4.02元計，霍主席呢次轉讓股份就套現1.2億元。
霍主席套現1.2億
集團解釋話，係霍主席希望員工可以分享到公司業務增長帶來嘅成果。而以場外方式轉讓，就可以將行政成本同其他相關費用減到最低，仲可以提高股份流通性。公司方面就話，獲邀參與呢次轉讓嘅員工反應仲幾理想。
太子唔明白點解公司唔直接送股畀班高層呢？即使唔送要轉讓，點解霍主席唔提供一個折扣呢？