筆者向來唔主張散戶投資新股，因為經過保薦人的精密計算，分析市場氣氛及承受能力，新股定價往往在合理並稍稍有溢價的水平。然而，如果純粹買來賣，即日鮮則另作別論，因部分基金捧場新股，有green shoe option的保障，只不過「好股唔到你份」，普羅股民認購到的新股比例唔大，贏極有限。

股市樓市兩旺，史提芬雖然對於經濟復甦的力度有一點點的保留，可是毫無疑問，對於儲蓄率高的中港兩地，海嘯對民生影響的確十分輕微，觀乎大部分高級消費場所的興旺程度，可見一二。

主攻百貨業、名牌手錶、珠寶鑽飾的廸生創建（00113）發成績表，嚇人一跳，純利大跌75.6%至5,137萬元，每股賺13.8仙，但廸生維持慷慨派送，末期息派18仙，連同中期息11仙，合共派息29仙，派息超過每股盈利一倍有多。

趁海嘯乘機減值

抱住橫掂市道唔好的原則，唔少公司都趁市場預咗海嘯年業績唔好，進行一次過的減值，廸生亦唔例外，去年為零售店舖的固定資產減值1.16億元，是拖低業績的關鍵，撇除此數，實質經營溢利2.03億元，比前年只係少一成。即使經歷海嘯衝擊，去年銷售額38.4億元，仍比○八年微升2.4%。

令人關注的是，與廸生合作廿載的Polo Ralph Lauren，將取回自行經營，今年底之後，廸生將交出Polo商標之商品授權，條件是補償1,820萬美元或1.42億港元，撇除今年餘下時間開店的可能，廸生零售網絡會由495家回落到400家。

Polo佔廸生總收入多寡，未有透露，不過從多方面衡量，廸生仲係平得交關。撇開減值影響，廸生往績市盈率6.9倍，淨現金5.3億元，等於市值11.5億元的四成六（年底收埋Polo 1.42億元後係五成八），剔除淨現金，實際市盈率得3.7倍，就算明年商店少了五分之一，盈利按比例減少，估值仍然唔貴，大中華零售內需股之中，都算係「平霸」。