新股熱潮持續，昨日首天掛牌嘅中金屬（00773）一度高見6.71元，收市報6.32元，較招股價高22%，全日成交15.89億元，相等於公司四分之一市值，可見相當旺場。同日上場嘅新股仲有興利（香港）（00396），收報1.42元，較招股價高出39%。市場對於正在招股嘅361度（01361）估值高低存在分歧，但散戶認購新股，多半抱賭博心態，最緊要係市場氣氛利好，估值高低反屬其次。
據內地傳媒報道，六月份內銀新增人民幣貸款持續高企，估計上半年新增貸款總額達到6萬億元人民幣。大量熱錢充斥市場，股市「維穩」目標基本上已經兌現，部分「利錢」轉投房地產市場，使得近期內地樓價升勢再現。睇咁嘅形勢，為確保實現「保八」目標，讓樓市價、量適度齊升，與股市齊生「財富效應」，這對於刺激消費、推動內需，幫助良多。故可視內房股調整為買入機會，首選中國海外（00688）、華潤置地（01109）及富力地產（02777）。
講開又講，其實今年上半年內地豪擲銀彈救市，頗大部分投入基建類別。不過，見基建股表現較為參差，就如中交建（01800），現價仍處於今年初嘅水平，明顯跑輸國企指數及同類股。
之所以股價大落後，主要係中交建嘅業務分散喺港口、路橋及鐵路業務多個領域，與其他側重喺鐵路基建嘅基建股比較，鐵路概念相對遜色。反而由於內地出口形勢依然嚴峻，致令旗下港口機械設備及基建疏浚需求下滑，估值亦自必然受到負面影響。
手頭合同年增四成
此外，公司亦兼營海外市場，如今投資者目光都放喺內地市場，相對於主營內地基建市場嘅同類股，中交建又顯得有點輸蝕。
不過，今年以來，鋼鐵等原材料價格持續回落，應有利於紓緩毛利率下跌嘅壓力。截至去年底，公司嘅手頭合同金額達3,343億元人民幣，按年增長40%，至少本年度業績不用愁，而下半年業務復甦進度，對明年業績影響較大。
有一點值得留意，就是港珠澳大橋如無意外將於今年底動工，五年內完成，預計相關工程項目於今年第三季招標。中交建亦有參與港珠澳大橋嘅設計，而相關工程項目亦係其強項，話唔定可以乘其便取得一定比例嘅定單，藉此翻身。
中交建股價由本月上旬高位11.5元回落至昨日收市價9.25元，累計跌幅已經超過兩成。近日開始見到大型買盤承接，短線喺9元邊可留意博反彈嘅機會，目標睇20日線10.4元，50日線支持位喺8.5元。