撞正雷曼聆訊真頭痕

數數手指，六位執行董事中，除了正副行政總裁，即係韋奕禮及張灼華，任期於二○一一年才到期外，其餘四名差不多時間夠鐘。

八月到期嘅係掌管企業融資部嘅何賢通、掌管市場監察部嘅雷祺光；法規執行部嘅施衛民就喺九月；營運總裁簡俊傑十月就任期到。加埋證監會主席亦都喺今年十月十九日任期到，雖然佢哋獲續約嘅機會好大，但可以咁講，證監會未來嘅人事安排，相信會成為各界嘅焦點，尤其係雷曼迷債事件仍然未能夠解決，不少執董要被召出席立法會聆訊，個別執董亦要處理雷曼迷債和解事宜，以及研究改善監管制度事宜等等。

好似韋奕禮今日就會首次出席立法會雷曼小組聆訊，證監會上下無不嚴陣以待，作出配合，而何賢通亦已預期會於七月出席聆訊。

順帶一提，證監會兩名非執行董事陳鑑林及鄭維志，都喺今年十一月任期到。睇嚟，負責任命嘅政府都幾頭痕，有排忙！

講番雷曼迷債和解，噚日有消息話銀行願意賠六成，高齡更加可以賠七成，太子聽聞，有消息話銀行更可以賠到八成，但證監會仍然不接受，以十成為目標，大家即管今日聽吓韋奕禮喺立法會有無嘢講！