本周三，美國總統奧巴馬將公布一系列監管金融體系嘅精簡及重組的新方案，有消息指出，屆時美國政府將宣布自大蕭條以來最進取嘅金融體制改革。美國財長早前訪問中國之時，已經就即將推出的金融體制改革放風。
事實上，金融海嘯嘅出現，差不多把整體華爾街「淹沒」，美國政府喺穩定信貸市場過後，實有必要改革金融制度，以防止類似嘅情況再次出現，此舉亦係向債權人一個負責任嘅行為。
大市持續喺高位整固，但企業活動消息不絕於耳，就如平保（02318）昨日終於復牌，並一如預期宣布增持深圳發展銀行，收購作價相等於深發展預測市帳率2.6倍及市盈率19.4倍。市場對呢項收購反應正面，昨見其股價一度衝上61元，只是尾段大市跌幅擴大，拖累平保回落至57.15元收市。阿莊睇好平保前景，會繼續持有。
內地A股即將重啟IPO，對於內地證券商而言，實屬好消息，事關這意味着企業融資業務有望重現活力，若首批IPO表現成功，重建投資者入市信心，更有望為A股市場注入新嘅上升動力。
此外，A股IPO重啟，亦意味着不少排隊多年、等發A股上市嘅企業可以願望成真。結合呢啲有利因素，阿莊認為，唔需猶豫，把握最後召集，吸納光大控股（00165）。
分拆有助價值重估
光控持股39%嘅光證及持股6.2%嘅光銀，籌備掛牌已有數年之時間，依家只待A股重啟IPO。早喺去年，光證已通過新股上市審核，若年內成功喺A股掛牌，勢必令光控嘅資產淨值急升，並帶來一筆可觀嘅特殊收益。
除了本身發行A股嘅上市計劃之外，A股IPO重啟之後，亦有望再次激活A股的交投，企業融資活動增加，將直接帶動券商服務收益增長，故對光證而言，可以話係雙重受惠。
至於光銀，雖然今年內地經濟增長仍存不明朗因素，但在重組效益帶動之下，該行預期今年嘅淨利潤將達到73.2億元人民幣，貸款總額按年增長14%。截至去年底止，光銀嘅資產總額為8,518億元人民幣，公司早於去年已就發行A股遞交申請，如無意外，年底前應該有眉目。
除了A股概念之外，作為一家紅籌金融企業，光控亦受惠CEPA補充協議內，有關港資證券行可於廣東省設立合資證券投資諮詢公司嘅措施。以目前公司坐擁逾40億元現金，未來將會陸續加大直接投資、資產管理及產業投資業務，白啲講句，係唔愁冇炒作藉口。
以光控現價計，往績市盈率二十八倍，市帳率2.1倍，若一切順利，照計明年將會係踏入豐收之年，事關光證及光銀將真正「生金蛋」。阿莊打算趁調整入市，喺A股「維穩」及兩地金融產業進一步融合嘅大前提下，揸一年半載，可博50%上升空間。