本文重點
沉寂多時嘅新股熱潮呢輪又旺起上嚟，尋日就有兩隻新股霸王國際（01338）同361度（01361）撞期路演，一句「動L」搞到霸王出晒名嘅成龍大哥雖然要拍戲無嚟到，但依然拍咗條短片大派飛吻撐場，至於另一邊嘅361度就用待客態度取勝，實行搵咗批有公司廣告牌嘅的士嚟送客！
太子身邊唔少老友都好關心究竟成龍會唔會親身出席路演撐吓霸王，公司事前亦神神秘秘，只係話「到時你就知」。
成龍錄短片撐霸王
原來成龍大哥佢因為工作太忙，所以就拍咗條短片畀公司喺推介會上面播出，條片入面嘅佢依然坐喺度猛話霸王洗頭水好用又有效，叫投資者要有信心，令人諗起佢喺洗頭水廣告深入民心嘅演出，佢臨尾仲大派飛吻，呢一幕恐怕平時大哥嘅電影都唔係咁易見到。
好多人都想知成龍做霸王代言人，報酬係咪好溶，據聞招股書冇獨立披露，但霸王市場推廣費過億，睇怕成龍大哥都分一杯羹，至於歌后王菲筆數，就唔入呢個年度嘅開支。
361度廣告的士接送
另一隻打對台嘅新股361度為咗出奇制勝，營造青春活潑嘅氣氛，公司請咗兩名港男以及人氣模特兒周秀娜亮相，佢哋仲有一招吸引投資者，就係幫投資者call咗幾架有361度廣告嘅的士到酒店，負責接送，太子聽講佢哋已喺250架的士賣廣告，走均全港九。