13/06/2009

播放本新聞相關短片
 
股價號碼: 

Fundman睇市:上實唔使心急買貨

前晚,美國勞工部公布上周首次申領失業救濟金人數,意外減少2.4萬人,至60.1萬人,較預期61.5萬人理想。持續申領人數雖在高位徘徊,但投資者解讀為,雖就業市場寒冬未過,但最壞情況經已過咗。道指再升31點收市,報8,770點,差6點就去番去年大除夕水平,收復○九年所有失地,從低位6,469點計,累積反彈35%!環球經濟見底,配合通脹預期不斷升溫,市場唔愛銀紙愛資產,國際能源機構(IEA)調高全球原油需求預測,紐約期油再升1.35美元,去到72.68美元1桶水平,多項因素支持,油價明顯已進入新一浪上升周期。

回顧過去一個星期,相信無太多人預到,周二失守萬八點跌到17,710點,是絕佳的入市時機。雖然恒指尋日跌穿萬九點關口,最後收報18,889點,但全星期計,則升210點或者1.1%。

繼續炒股不炒市

金融海嘯後的影響,現時全球通脹仲係相當溫和,甚至係無通脹,可是投資市場預期各國政府救市,增加貨幣供應及寬鬆貨幣政策,會維持一段時間,直到經濟有明顯起色至會收手,同時縱容通脹肆虐,這個想法會否成為事實,可能我哋去到今年底、明年中先會有答案,但短息低到唔夠1厘,錢太多的情況,加上通脹預期足夠令股市升完再升,在見到資金明顯流走、港元轉弱之前,股民都係無謂諗太多,買股唔買市是也,但緊記即使唔睇好,亦唔好加入做淡。

寶勝國際(03813)發出盈警,估計截至三月底止半年業績會大倒退,原因是和運動品牌Converse的中國獨家品牌代理安排,在去年底屆滿,加上海嘯及京奧後運動用品銷售放緩所致。

寶勝昨日急跌0.1元報1.17元,睇番今年首季賺68.4萬美元大跌96%,上半年業績難睇,市場係雞食放光蟲,有晒心理準備,睇番五月推介時股價仲喺0.8元附近,上星期已見1.43元,可見今日熱錢唔理好醜,最緊要就手,夠落後就乜都炒得一餐。

Converse獨家代理完結,分析員一早有心理準備,預測今年賺3,650萬美元,只及○八年7,002萬美元一半左右,預期市盈率16.8倍,都係睇定啲,等十九日中期成績表出來至算,短期回吐壓力應該未完。

購地產項目穩賺

獲母公司打補針,早已是中資窗口公司提升業績的不成文習慣。上海實業(00363)以22億元人民幣,向母公司收購上海黃埔江西岸徐匯區四幢豪宅項目,總可售建築樓面10.352萬方米,項目鄰近上海世博會場,預期在明年前完工開賣。野村同上實計數,出價相當於每米收購成本1.9萬元人民幣,比同區現時市價4.2萬元人民幣低,一買一賣,上實幾乎是穩賺不賠。

昨日上實股價反高潮,倒跌2.05元,收報34.05元,反映現時股民確係愈來愈精明,分析利弊之餘,亦深明好消息沽貨之道!這類母公司提供一次過着數,雖然能潤飾一兩年業績,但唔屬於持續營運項目。或者,找內部回報率有一成五至兩成的公路或者基建項目去投資,股民及基金經理都會更受落。不過,話說回頭,即使唔計這筆意外之財,上實今年預期市盈率15.5倍,對比唔少炒到癲嘅二三線股,估值合理,估計股價回到32至33元,經已有足夠吸引力。

投資要精明 助你成為投資達人
詳情瀏覽on.cc《精明理財》

史提芬