投資者寧可待破位才湧上車，都唔情願冒住「接火棒」嘅風險入場，呢種心情可以理解。喺咁嘅情況之下，經驗告訴阿莊，後市升跌都會來得好急，各位請記住「緊握扶手」﹗

阿莊持貨嘅中國忠旺（01333），呢兩日反彈上9元水平遇壓，惟相信升勢未完，會睇多幾日，若能突破9.11元，更會考慮短線加注。

聯想潛力不容忽視

大價股唔行，細價股又靜咗落嚟。炒家唔放過任何炒作消息，昨日特區政府宣布幼稚園、小學今日起停課，即見資金一哄而上追入醫藥股，將生產「豬流感」疫苗嘅海王英特龍（08329）升15%、維奧醫藥（01164）升25%，仙股中國仁濟（00648）升17%。

中證監正式就進一步改革和完善新股發行體制發布指導意見，估計IPO最快於本月下旬重新啟動，市場擔心A股市場供應增加，將不利後市，故見昨日A股回落。不過，阿莊深信，中央政府不會「搬石頭砸自己腳」，只要IPO企業質素好，股價表現理想，所產生嘅財富效應，反可加強投資者嘅入市信心。若然內地真係喺月底重啟IPO，大家宜密切留意首批掛牌嘅企業，以評估相關措施對市場嘅影響。

個股方面，呢兩日聯想集團（00992）股價明顯做好，昨日收報3.19元，升5.6%。因應市場變化，今年聯想改變策略，將力谷內銷市場，配合中央政府加大力度推行「家電下鄉」政策，相信上半年銷售表現會觸底，若下半年海外市場情況有改善，相信全年表現可望優於市場預期，重估潛力不容忽視。近日股價回升，成交增加，短線應有力再試衝3.5元阻力位。

講起電腦股，阿莊又想起做筆記本型電腦外殼嘅巨騰（03336）。早前公司宣布斥資增持一家鎂合金外殼製造商嘅權益至55.56%，由於鎂筆記本型電腦外殼較塑料外殼具更高邊際毛利，增持實屬明智之舉。

業務前景一片光明

由於筆記本型電腦取代桌上個人電腦嘅趨勢明顯，而外判工序已經成為大趨勢，預期這個市場可繼續保持雙位數字增長，而巨騰手執三成市場份額，不見得業務前景會被金融海嘯嘅短暫影響所左右。此外，公司正積極拓展液晶體電視外殼及金屬筆記本型電腦外殼等業務，將於未來數年為業績注入新嘅增長動力。

如無意外，今年上半年，巨騰嘅業績增長或許未及去年下半年，惟展望下半年，整體業務增速將會回復正常。再看股價表現，早前赴台上市，股價炒上5元才止步，近周回落至4元水平現承接。以昨日收市價4.2元計，往績市盈率約6.4倍。即使計及上半年業績增長可能暫時放緩嘅因素，估計預測市盈率仍屬單位數字，極具吸引力。

短線策略，若守得住4元樓上，可以小注博反彈，待回升至4.6至4.7元水平食胡，穿3.8元止蝕；中長線只要守喺3.5元樓上，大可繼續持有。