12/06/2009

播放本新聞相關短片
 
股價號碼: 

墨國卡包尾匯豐唔服氣

滙豐美洲業務又畀人揭瘡疤,話說佢哋做到出晒名嘅信用卡業務,喺墨西哥嘅消費者組織調查入面居然「肥佬」,10分滿分只拎得4.5分。反而西班牙嘅BBVA(即係中信行(00998)嘅策投)就以8.6分高踞榜首。

消費組織資料過時

呢個墨西哥消費者組織調查咗當地18家銀行嘅信用卡業務,內容包括客戶條款、銀行網站及銀行廣告等各方面,10分滿分,5分合格,結果只有五家銀行「肥佬」,其中四家係小型嘅墨西哥土炮銀行,「肥佬」嘅大銀行就只有滙豐,仲要係排名最低添。

滙豐聽到自己唔合格仲要排第尾,當然會上訴啦。據了解,佢哋話有關調查用嘅根本係過期資料,依家畀客戶嘅資料透明度高咗,網站亦已有所改善。睇嚟兩邊駁火,大家有戲睇,娛樂性一定大增。

今次調查大贏家係BBVA,分數多滙豐近一倍,最衰依家墨西哥疫情不穩,否則中信行乘機派員工去當地學吓信用卡業務,內地同胞一定得益唔少。

投資要精明 助你成為投資達人
詳情瀏覽on.cc《精明理財》