不過，證券行對美息幾時掉頭回升，暫時睇法都頗極端，瑞銀策略員認為大部分債市炒家睇錯市，明年六月前加息機會唔大。至於高盛美國首席分析師Jan Hatzius就認為，在今年餘下時間及明年全年，在異常疲弱的經濟復甦動力下，距離聯儲局加息之日，仲係相當遙遠。

無論加唔加息，單係預期會加，對累積升幅唔小嘅港股，殺傷力經已唔細，恒指尋日一度跌超過500點，收市跌幅收窄，跌194點，險守萬八關口，報18,058點，但主板成交已經連跌五日，反映股市熱錢參與頻率正在下降，從技術上睇，唔係好兆頭。

高盛認為電力股今浪大落後，市場忽略行業景氣正在好轉當中，包括燃煤成本開始向下、電廠設備使用率好過預期、未來兩年固定投資減少等等。中國電力（02380）宣布向母公司收購五凌電力63%權益，代價44.65億元（人民幣．下同），五凌主攻湖南及貴州一帶發電生意，以及嶄新的環保水力發電業務。可惜消息一出，國電股價卻出現反高潮，由一年高位2.8元插落2.58元收市。

今次母公司願意七成代價以新股支付（每股2.408元），變相增持，國電大約只花13.4億元現金，1.2倍市帳率的收購價睇嚟亦唔貴，交易令總機組發電容量由9,037兆瓦增至11,282兆瓦，純睇帳面，國電本身市值不過93億港元，交易金額超過一半市值，總發電能力卻只增加25%，睇落唔抵，但這個跟國電股價被低估絕對有關。

進軍水力發電市場

五凌過去兩年稅後純利分別為4億元及1.91億元，如果用PE計，當然唔平，但至少比國電去年本身勁蝕6.83億元為佳。德銀出報告修訂國電盈利預測，估今、明兩年賺8.2億元及8.53億元，或者每股23分及24分，以插水後股價計，市盈率只得9.9倍及9.5倍。過去兩年，電力股可謂無啖好食，但正如高盛提出，煤價及通脹回落，電價有上調空間，都意味着電力股悲慘的日子已經過去，單由交易數字，交易的即時刺激作用唔大。但基於內地政府大力促進可再生能源發展，目標十一年後佔全國總消耗量15%。

或者，今次交易可視為國電用一個唔貴嘅價錢，買一張水力發電的入場券，等好消息出貨完成，值得留意。