理論上，六月份係基金半年結，傳統智慧，除非有重大不利消息出現，否則班大戶點都托埋呢個月。之不過，次季以來港股累積了可觀升幅，游資喺高位藉大風浪逐步散貨離場，又言之成理。
若冇估計錯誤，七月初排隊「出爐」嘅次季經濟數據，將優於市場預期，要提防大戶喺高位震倉過後，會唔會再抽高大市做半年結，等喺七月上旬公布經濟數據期間，再向各位派發「糖衣毒藥」﹗
提防升市近尾聲
阿莊亦相信，通常升市喺最後一段先至係最燦爛，但亦會係最危險嘅時候。既然呢啲位入場做好倉，頂多博多15%利潤，唔到遊戲最後一刻唔離場，抑或急流勇退，留番最後一浸畀啲「勇」者玩，乃此刻各位要深思嘅問題。
事實上，最近不少投資名家亦不約而同地表示，近期環球股市升勢，並非牛市重臨，就連有「國際大鱷」之稱嘅索羅斯，最近到訪內地時亦同出此言。
講開此君，有一點值得一提，佢話喺內地政府推出多項刺激經濟方案之下，內地經濟復甦將較美國快，未來更有望成為全球經濟引擎。然則，朝着呢個大方向，投資組合之中，長倉總不少得實力中資股嘅份兒。
阿莊持有嘅平保（02318），昨日仍然停牌，聽聞公司將入主深圳發展銀行，並會以股份支付收購代價。若然消息屬實，平保可藉着購入呢項銀行資產，擴大喺華南地區嘅銷售網絡，做大金融業務，策略意義深遠而正面，故會繼續作為長線持有。
講到投資組合，阿莊持有嘅中國製藥（01093），尋日公布首季業績，純利2.62億元，同比增幅72%，股價衝上全日高位4.79元後急回，最低見3.95元，收報4.08元，若然唔係有咩隱憂，就當係大戶震倉，照計4元支持位不容有失。
昨日股市大幅波動，但中移（00941）嘅股價相對硬淨，收報79.35元，升0.06%。事實上，相對於同屬重磅股嘅大笨象滙控（00005），呢一個大升浪，中移嘅走勢相對落後，若然大戶要再挾高大市，焦點應該落喺中資電訊股身上。
3G搶客夠進取
聯通（00762）月前已開始推出其3G服務，三大運營商要搶攻市場份額，打減價戰係必然嘅招數。
三大之中，中移位置相對較為被動，聯通和中電信（00728）嘅策略則較為靈活，早前聯通便推出十分進取嘅3G服務計劃，成為市場焦點。老實講，推3G業務初期，ARPU受壓係預期之內，相信三大無一幸免，但長遠而言，聯通仍有望以後來者方式，積極搶攻市場，攤分從中移流失嘅客量，故勝負誰屬仲係未知之數！
睇聯通嘅股價，上周衝12元不果後現回吐，昨日一度低見10.52元，差不多回補咗上升裂口位，若後市真係仲有得去，中資電訊股起舞，聯通股價有機會再次向12至13元水平進發，穿10元止蝕。