過去兩個交易日，港股的表現都同本港天氣一樣，時晴時雨，令人難以捉摸。尋日恒指收市險守18,000點水平，不過綜合全日走勢，恒指先升後跌，回升後再跌，上上落落，高低位波幅逾700點。歸根究柢，恒指至今累積升幅已大，就連細價股在不經不覺間，亦都經已炒了四個星期，因此回調實屬正常，只係擔心，個市若然係轉勢而非調整，之前升得咁勁，跌嘅時候亦自然唔會就住就住，大家必須提高警覺。
東航（00670）同上航合併一事繼續鬧得熱烘烘，市場更有傳重組方案中，東航計劃將全數吸收上航的資產和負債，但內地亦有消息指，由於東航有降低資產負債率的打算，此舉就惹來市場人士猜測，東航或將重新引入新加坡航空公司作為戰略投資者。不過，點都好啦，至今為止，呢一切都仲係得個估字，要知道發生乜事，仍有待正式的公布，記住要留意住啦。
講開內地，尋日工信部就公布，內地今年首四個月的累計產金量達到93.8噸，即已經完成今年目標產量的32%，較去年同期的產金量增加9.76噸，或11.61%，料今年金礦股表現將會唔錯，值得憧憬。