唔單止咁，梁太早前仲喺佢嘅CEO Blog度提到與恒生嘅淵源。話說當年佢加入銀行界，特別要多謝恒生創辦人之一嘅何善衡博士。

原來當年何善衡成立咗個進修班，令梁太有機會接觸銀行業，當年佢仲喺何善衡手上，接過一本珍藏至今嘅紅色證書，所以梁太喺何善衡身上，深明培育人才係對未來最佳投資嘅道理。

如今執掌恒生，梁太何其重視與團隊溝通，佢除咗走訪唔同分行，仲飛埋去北京、上海同當地監管機構嘅領導交流。梁太更親身拜訪恒生元老，除咗有利國偉博士，又分別同創辦人之一嘅何善衡博士、恒生元老何添博士及梁銶琚博士嘅家人會面。

潘仲賢：新財監快落實

恒生近排人事更替咁密，梁太繼續拍心口話無重大改革，只有進化。太子尋日同恒生常務董事兼副行政總裁潘仲賢傾開，問佢新財務總監搵到人未？佢話好快會有公布，人選「都算係外面搵返嚟」。咁講法，唔通又會有人喺滙豐轉過嚟？