被喻為童話主角的鄧麗欣（Stephy）與方力申，早前於拍拖10周年分手，「分」後首度現身的Stephy面容憔悴，受訪期間兩度用紙巾拭淚。她承認作出決定及宣布分開都很快，需要時間消化及冷靜，並親揭與台灣同性密友小牛的關係！至於小方則趁Stephy返港之際，巧合地於同日下午避走內地！

Stephy兩度落淚，明言需要時間「消化」情傷。

Stephy被大批傳媒包圍，寸步難行。

Stephy分手後首度面對傳媒，面容憔悴。

情傷未愈的小方，昨日趁Stephy回港之際避走內地。

鄧麗欣與小方於本月17日透過公司發聲明宣布「分手」，Stephy於昨午5時由台灣獨自回港，化淡妝的她難掩憔悴，在4名保安護駕下面對半百傳媒。受訪期間，明顯消瘦的她一直眼紅紅，她先感謝大家的關心，並坦承宣布「分訊」前已帶媽咪避走外地，好讓自己「消化」分手之痛及清靜一下，其後再獨自飛往台灣，她說：「頭幾日報道出嚟我唔係好夠膽睇，想冷靜吓先，後來有睇晒，知道大家好擔心，朋友嘅訊息我未必可以一一回覆。」說到這裏，便一度哽咽而停了10秒。

同小牛亦師亦友

Stephy續指感情是兩個人的事，很難用三言兩語解釋分開原因，希望各界體諒：「大家可能覺得我哋係童話，會加插好多故事，或者合作嘅嘢，喺真實，我哋同一般情侶一樣要面對好多問題，當問題累積，就好難解釋同解決。」問到最難解決的問題是否與小牛有關？她只承認決定分開及公布消息都很快：「回應唔係咁易，我去台灣要處理其中一樣排球嘅事，大家影到只係我身邊普通女性朋友，大家用正常角度去睇，件事就唔會咁複雜。（怕畀人話同性戀？）完全冇諗，大家唔好再揣測太多，除咗會傷害我哋兩個，亦會傷害身邊朋友，呢樣係我最唔想發生嘅。（同小牛有冇發展機會？）佢同我只係好好朋友，嚟緊排球好多嘢需要佢指導，我哋亦師亦友。」問到小方是否認識小牛？她坦言未曾正式介紹雙方，但小方知道她去年曾帶排球隊到當地特訓。問到小方可會相信她與小牛「冇嘢」？她說：「雖然我同小方冇咩聯絡，但覺得我哋有共識。」

重申冇第三者

而談到分手前的箍煲之旅，Stephy最初否認，其後才說：「當時唔係咩箍煲，我哋去台中有啲私人事，去咗兩日。」她重申分手絕對不涉及第三者，分開是她與小方一齊作的決定。至於問到與小方可有復合機會？她說：「將來嘅嘢隨緣，暫時我覺得可以做好好朋友，亦希望繼續合作，希望大家保持好好關係。（會主動聯絡佢？）會，搵個適當時間，我都需要時間抖一抖。」Stephy離開機場時再次引起混亂，舉步維艱時兩度落淚，要用紙巾拭淚，雙眼及鼻子哭至通紅。

另一邊廂，Stephy回港之際，卻輪到小方避走！昨午2時，有人目擊小方在助手陪同下現身離境大堂，據知他是到長沙工作，而面對連串有關Stephy與小牛緋聞的追訪，他統統拒絕作答。

文：音樂組

攝：劉智源、鄭家俊