新一代宅男女神李佳芯人氣愈來愈旺，昨日出席商場活動搵真銀，愛情事業兩得意，但被問到與男友陳炳銓戀愛近況，以及會否閃婚等，她即貫徹口密低調作風，落力護愛苗！

李佳芯出席復活節活動，與小朋友畫復活蛋。

野心勃勃事業型女性「紀芸芸」一角，令李佳芯吸納不少女粉絲。

宅男女神李佳芯（Ali）憑劇集《潮流教主》中事業女性紀芸芸一角，人氣再往上翻，她自爆劇集成功為她洗底，擺脫之前演出小三、狐狸精等角色的負面觀感，令她多了女性Fans，昨日更獲商場邀請出席活動，與大人細路齊賀復活節。

擺脫「狐狸精」形象

Ali於活動上與小朋友繪製復活蛋，盡顯愛心一面，問到是否喜歡小朋友？她說：「媽媽有9兄弟姊妹，我細細個就有好多表弟表妹，習慣晒同小朋友相處，近排拍緊新劇《與諜同謀》，飾演有個5歲小朋友嘅媽媽。（《潮流教主》帶挈你多工作？）其實我都估唔到一個負面角色，出嚟反應都幾正面，之前我演小三、狐狸精多，今次演事業女性令我多咗女Fans，多咗唔同觀眾層。（今後拒演小三？）一向冇揀角色，唔同類型嘅角色都接觸到，我只會諗點樣演好每個角色。（工作忙有冇時間同nowTV主持男友陳炳銓行山、食飯？）呢方面我不嬲低調，食飯、行山係我工作以外正常生活，冇乜特別回應。」

山聰追求？諗多咗！

提到有傳合演《潮》劇的陳山聰展開追求，Ali說：「我唔知，山聰份人好Nice，我哋同一個經理人，佢好似師兄咁，會主動建議我點樣可以做好啲。（佢太入戲畀人誤會？）呢個要問番佢，大家都係專業演員，我諗外間諗多咗。（羅仲謙有冇同你提過佢同楊怡結婚？）冇，係咪真？係真嘅我恭喜佢。（TVB姐仔紛紛閃婚，幾時到你？）吓？我未有咁嘅計劃，之後嘅嘢之後先諗！」

文：影視組