亞視將於四月一日「收檔」，新投資者司榮彬雖曾表示本月底欲舉辦「末代亞姐」，但資金未到位，亞視都要「熄機」，亞姐將成絕響！2007年亞姐冠軍張家瑩為之心痛，到保險箱取出價值三百多萬的后冠緬懷一番。

張家瑩戴上價值三百多萬的亞姐冠軍后冠，百般滋味。

張家瑩到銀行保險箱攞出后冠。

張家瑩獲媽媽親手戴后冠，重溫封后的喜悅！

亞視將於四月一日正式畫上句號，新投資者司榮彬早前聲言希望本月底舉辦「末代亞姐」作紀念，可惜資金未到位，莫講「亞姐」，就連「亞視」都要「熄機」！由於有傳亞視最有價值的節目《亞洲小姐》的后冠只值數十元，亞姐身價再被貶低，2007年亞姐冠軍張家瑩大感心痛，否認的同時更向「亞姐之父」葉家寶了解，得悉后冠由第一屆起已有珠寶店贊助，後期亞姐選舉因沒有贊助，后冠由亞視製造，價值幾千元，她對后冠價值得以「洗冤」而再展歡顏。

估值升一倍當嫁妝

昨日家瑩和媽媽到銀行保險箱取出共由25.299卡粉紅鑽和12.7901卡白鑽鑲嵌而成的18K白金后冠緬懷一番：「當選嗰晚至今戴過四次，咁名貴，會擺銀行保險箱。（鑑證過價值？）梗係有啦！仲升咗一倍！呢個后冠嘅榮譽遠大過價值，就算有人出雙倍價錢，我都唔會賣！我當佢係家傳之寶，好似嫁妝咁，再傳畀我將來個女，等我個女一代傳一代！」至於亞視曾稱最後一夜辦亞姐選舉，昨日向亞視了解，發言人黃守東說：「有關公司發展事務，可向臨時清盤人查詢！」而亞視臨時清盤人公司則向本報說：「暫冇回應。」

葉家寶叫出糧先

每屆亞姐冠軍后冠價值不同，1985年首屆亞姐冠軍黎燕珊透露對此沒有印象：「我有個鑲滿晒石嘅心口針，當年5萬蚊都好高，仲有錦綉花園單位、車同名貴鑽飾，總值過百萬！」談到末代亞姐爛尾，她坦言沒有半點唏噓。獲得價值300多萬元后冠的2008年亞姐冠軍姚嘉雯表示，后冠擺放家中收藏：「亞洲小姐咁有歷史，依家話停就停。」同屆亞軍顏子菲說：「可惜嘅係唔可以喺亞視輝煌嘅時候參與過，但欣慰嘅係亞視輝煌嘅時候被大家記得過。」身在倫敦進修的2009年亞姐冠軍許瑩表示其價值300萬的后冠收藏家中保險箱，對於末代亞姐落空，她深表惋惜及遺憾：「亞姐嘅舞台係幫助好多女仔實現夢想，雖然唔可以再延續落去，但將會係永遠無法超越嘅經典。」

另外，亞視前執行董事葉家寶前晚與麗的、亞視舊員工聚餐，仍被拖糧的他認為亞視應先解決欠薪，亞姐搞不成也不可惜：「我個人認為萬事以員工為先，冇可能唔出糧就去搞節目！如果仲去搞，個結果真係不敢想像，相信有負面效果！」又指暫未能透露新東家借錢予亞視的進度。

文：影視組