朱晨麗(朱朱)與敖嘉年於新劇上演一段苦戀,前者被太后打入冷宮,更滑胎兼跳井自盡,敖嘉年飾演的光緒帝沒權又沒勢,最後更被毒死收場。被指廣東話對白不純正的朱朱,今次一雪前恥獲讚賞,還獲嘉年大讚有古裝相,二人齊聲指角色相當慘情,演情感戲時更自動調校喊Mode流出真眼淚。

朱晨麗首演古裝挑戰悲情角色,由做手到唸對白都獲讚賞。

敖嘉年與朱晨麗再合作演感情戲,默契十足。

深宮之中,誰能自主?太后、皇帝、貴妃各懷心事;今次《末》劇從另一角度拍出清廷故事。

無綫20集新劇《末代御醫》將接檔《公公出宮》,於下周一(28日)起晚上8時30分首播,這部以光緒年間為背景的清裝醫學劇,講述民間名醫(郭晉安飾)被引薦入宮當太醫,為光緒帝(敖嘉年飾)及慈禧太后(羅蘭飾)治病,光緒雖想改變朝廷,但太后依然掌權,及後更把光緒軟禁,而與他情投意合的珍妃(朱晨麗飾)也被迫分開打入冷宮,最終跳井自盡,其後太后將姪女許配光緒,惟光緒離奇被毒死,太后即成嫌疑人物,她一怒之下命令太醫一日之內查出光緒真正死因以證清白。

獲讚廣東話有進步

對於朱朱曾被指唸廣東話對白不純正,無綫戲劇分部高級經理徐正康大讚她進步不少,朱朱則透露首次演古裝飾演一名妃子,為演好角色曾上網搜羅宮廷妃子走路的方法,又透過睇古裝片學習宮廷禮儀:「有睇好多演過珍妃嘅前輩係點演,同埋套劇好多四字成語,宮廷嘅人講嘢又冇尾音,唔似我哋平時講嘢語氣,所以有特別搵人翻譯同請老師執發音。」與嘉年曾於劇集《情逆三世緣》合演夫妻,故今次再演感情戲分外有默契。由於劇集一開始已交代她流產,故連場喊戲,朱朱不諱言角色相當慘情,故每次毋須培養情緒已流出真眼淚。

一埋位「光緒」上身

而嘉年對這個舊拍檔也讚不絕口:「佢演技比之前成熟好多,對白、做手都好入角色,佢個樣好襯古裝,不過今次同朱朱真正對手戲唔多,全套劇都係三分一左右,通常係睇佢寫畀我嘅信,其實我喊戲都好多!我覺得光緒帝係一個悲劇人物,係皇帝但冇權,就連揀太太都唔得,所以投入咗之後,一入片場就角色上身,淨係睇信都喊得出。」

文:影視組