JC生咗喇！長腿B女身長19吋半
男星安志杰（Andy）及名模未婚妻Jessica C.（JC），在美國時間昨日凌晨零時41分喜迎愛女Tessa的來臨，B女是一個肥妹仔，重8磅2安士，更遺傳了媽媽的長腿，身長達19吋半。初為人父的Andy自爆陪產時感動落淚，又透露會留在JC及Tessa身旁至女兒滿月，5月便回港拍戲賺奶粉錢。JC與Andy在1年內閃電拍拖、閃電佗B、閃電求婚，更閃電開工搵奶粉錢，譜寫「極速傳說」！
JC與安志杰榮升父母，B女肥肥白白，可喜可賀！
混血「警鐘胸」名模JC與未婚夫Andy去年10月宣布佗B喜訊，並於年底齊齊返美國老家待產。今年1月，Andy回港出席活動時透露即將迎來英文名Tessa的B女。前日，臨盆在即的JC上載摸着巨肚的自拍照，並留言表示會想念懷孕的日子：「I'll miss having you in there.Good night,baby.」網民紛紛留言祝她一切順利，原來她昨日已採用無痛分娩誕下愛女，母女平安，重8磅2安士的B女身長19吋半。
Andy 5月復工賺奶粉錢
榮升爹哋的Andy透過經理人分享喜悅之情：「Jessica喺美國時間12點推入產房，好好彩係順產，B女喺12點41分出世，係個肥妹仔，重8磅2。Andy話係一個好感動嘅時刻，亦多謝太太懷胎10月，同佢生咗呢個愛情結晶品，BB出世時佢都忍唔住感動落淚，覺得依家人生責任大咗好多，唔止自己，仲有老婆同個女！除咗開心，佢都會好努力工作，佢知道養小朋友嘅奶粉錢同埋教育方面都唔簡單。」經理人又透露「愛妻號」Andy會陪伴在JC及囡囡身旁，至5月即返港接拍電影搵奶粉錢，又不忘感謝傳媒的關心。
撻着有餡求婚 1年完成
Andy與JC的戀情發展一日千里，兩人閃撻、閃有餡、閃訂婚，拍拖以來不時大放閃光彈。他們前年合作電影《屍城》時擦出愛火花，同年年底公開認愛，其後一直如膠似漆，更明言視彼此為結婚對象。JC於去年10月默認有喜後，Andy即於月中在度假天堂馬爾代夫包起整個私人沙灘，更使出絕招「寄居蟹藏戒」向JC求婚，短短1年內完成人生大事！待產期間，小倆口不時恩愛出巡，除了合體拍攝超性感孕照外，上月中又為Tessa舉辦以粉紅色為主的Baby Shower，全心全意等待Tessa的誕生！
採：名人組、影視組
文：專案組
