寫真模尹蓁晞（Yumi）曾在台灣工作兩年，從此愛上當地的風土文物，特別鍾情台灣美食，鹽酥雞和珍珠奶茶更是百吃不厭。回港後她不時鑽研台灣食譜，雖然味道未如當地口味，但總算慰藉一下味蕾，她又坦言渴望將來嫁到台灣！

Yumi大讚台灣男生細心體貼，更想嫁到台灣呢！

Yumi最愛珍珠奶茶，更特別到朋友餐廳偷師。

Yumi曾到台灣發展兩年，坦言是一個很難得的機會！

Step 1
先將奶茶用熱水沖好備用，然後將已發好的珍珠放在杯中。

Step 2
奶茶倒在容器中，再加上碎冰搖勻。

Step 3
將已搖勻的奶茶倒在放了珍珠的杯中即成。

Yumi曾與陳偉成拍拖，可惜戀情只維持一年。

初出道的Yumi身形較纖瘦！

自嘲是為食鬼的Yumi，談到台灣美食時眉飛色舞。

尹蓁晞2011年認識了一名台灣的男友，在男友鼓勵下，獨個兒勇闖台灣娛樂圈，一待就是兩年，她說：「我啲普通話幾差，但一直都想去台灣住吓同發展，因為男朋友係台灣人，佢可以介紹一啲幕後製作人同模特兒公司人畀我識，有佢帶路，我覺得都係一個機會，所以就一個人過咗去！去到嗰邊我都有參與客串一啲偶像劇，亦有做綜藝節目主持，真正喺嗰邊生活，係一個好好嘅體驗！」

日食夜食變肥妹

Yumi自認是為食鬼，談起吃東西便興奮，剛到台灣，短短時間便發福不少，她笑說：「我真係好鍾意台灣食物，魯肉飯日日都要食一碗，佢哋分量又唔大，食兩碗都冇問題，珍珠奶茶更加係一星期飲足七日，仲要係最大杯嘅，夜晚就買夜市嘅鹽酥雞同炸雞排消夜，真係好好味，放假就同朋友去食麻辣火鍋，食到肥咗成十磅！」

回港後，Yumi對台灣美食念念不忘，四出搜尋台灣小食店，更買材料回家煮台式菜，她笑說：「我識煮魯肉飯同雞腿飯，珍珠奶茶其實都好容易沖，校好奶茶加珍珠就得，不過依家香港都有好多地方有珍珠奶茶飲，有時都會自己沖吓花茶飲，我喺台灣嗰邊都有去九份嘅山上飲茶，環境風味一流！」

嘆與阮經天無緣

這次Yumi特別前往好友的台式小店學做更多台灣食物，親自炮製最愛的珍珠奶茶，更笑言毫無難度。

她又憶述曾有機會跟型男偶像阮經天合作，可惜最後泡湯：「嗰陣我去一套電影嘅Casting，係演一個軍妓角色，導演問我尺度可以去到邊？我心諗可以同阮經天合作，係一個好難得嘅機會，所以我就話只要角色需要，尺度冇問題，最後竟然畀我入到圍，不過當時因為我簽證出咗問題，被迫要返香港，惟有推咗部戲，真係遺憾！」

她笑言喜歡眼睛小小的男生，又大讚台灣男孩夠體貼細心，她說：「佢哋會幫女朋友攞手袋，又經常揸電單車接女朋友返工放工，好Sweet！我都想嫁去台灣，哈哈！」

後記：為愛遭雪藏戀陳偉成泡湯

嫩模出身的Yumi曾推出性感寫真，當年身邊不乏裙下之臣，戀愛大過天的她，後來因為只顧拍拖而被公司雪藏，其後她到台灣發展，事業平平。

回港後，她跟「宅男女神」周秀娜的髮型師舊愛陳偉成撻着，二人相愛時如膠似漆，經常孖公仔現身，相戀一年便告分手。分開後兩人一度互寸抽水，現時陳偉成已搭上台灣女模，而Yumi亦自爆有追求者，但還未到達情侶階段！

文：Ada Lam

攝：黎志輝

場地：O"Casa