蕭正楠（Edwin）昨日與女友黃翠如為劇集《幕後玩家》開工，談到同劇的黃宗澤（Bosco）被本報踢爆戀上日模，已完成是日戲份的翠如笑言早料到很多傳媒追訪事件主角，所以她還是立刻離開現場為妙，更指彼此對手戲不多，故不知Bosco有新戀情，而在旁的Edwin則表示與Bosco於戲中較多對手戲，問到可有覺得對方近日春風滿面？他說：「佢一入劇組就咁開心，因為戲入面都係拍兄弟開心戲，等一陣同佢八吓先。（冇同你講感情事？）好少提起。（襯唔襯？）睇過幾張相，但睇唔清楚個樣！」而翠如對於Edwin有意帶母親遊澳洲，問她會否同行？她則透露稍後將到北半球拍攝旅遊節目，但澳洲卻是地球另一邊，Edwin聞言即說：「希望就到喺一個點Join埋，唔係邊個照顧我阿媽先，一齊玩開心啲！」

蕭正楠與黃翠如均表示不知Bosco新戀情，但大爆Bosco開工時很開心。

另外，與Bosco分屬好友的梁烈唯則說：「如果係真都戥佢開心。（擔心異地戀難維繫？）唔會啦！依家科技咁發達，真嘅話我當然祝福佢哋，畀啲空間佢啦！」